Техникийн судалгаа

Хэрвээ Та ямар нэгэн багаж, техник, насос, тоног төхөөрөмж худалдан авах гэж байгаа бол юуны өмнө уг бүтээгдэхүүний албан ёсны борлуулагч буюу буух эзэнтэй, буцах хаягтай байгууллагад хандахыг зөвлөж байна. Яагаад заавал албан ёсны борлуулагчаас авах нь дээр вэ? Аливаа техник, багажинд тодорхой хугацааны дараа засвар үйлчилгээ, сэлбэг хэрэгсэл шаардлагатай болдог. Манай зах зээл дээр хуурамч, дууриамал бараа, эсвэл, өөр зах зээлд зориулагдаж хийгдсэн манай хүчдэл, тог цахилгаанд тохирохгүй бараа маш ихээр борлогдож байна.    Худалдааны хууль, зохицуулалт муутай манай орны нөхцөлд албан бус сектор буюу сайн дурын худалдаачид чөлөөтэй үйл ажиллагаа явуулж худалдан авагчдыг төөрөгдүүлж, албан ёсны нийлүүлэгчдэд ихээхэн төвөг учруулж байна. Албан ёсны борлуулагч байгууллага л тухайн зах зээлийн онцлогт тохируулж багаж, техникийг захиалгаар үйлдвэрлүүлэн нийлүүлж, баталгаат хугацаа олгож, сэлбэг нийлүүлэлт засвар үйлчилгээг хийх эрхтэй байдаг.    Багаж, техникийн сонголт, ашиглалтын талаас нь авч үзвэл, манай орон нэлээд онцлогтой, тухайлбал, өргөн уудам нутаг дэвсгэртэй, цаг агаарын эрс, тэс уур амьсгал, халуун хүйтний туйл, тоос шороо ихтэй, далайн түвшнээс дээш нэлээд өндөрт өргөгдсөн гэх мэт. Өөрөөр хэлбэл, хүнд нөхцөлтэй орчинд тооцогддог. Ийм орчин, нөхцөлд ашиглах багаж техникийг ихэвчлэн тусгай захиалгаар  тухайн зах зээлд тохируулан үйлдвэрлүүлж нийлүүлэх ёстой. Чанарын хувьд дээд зэргийн чанартай техник хэрэглэх шаардлага гарч байгаа юм. Нөгөө талаас, цахилгаан үүсгүүр, цахилгаан багаж, насосны хувьд тухайн орны эрчим хүчний дэд бүтцийн онцлогтой холбоотой хүчдэл, давтамж гэх мэт техникийн өгөгдхүүнүүд өөр өөр байдаг. Тухайлбал, Японы хувьд хүчдэл (110 вольт) өөр, Солонгосын хувьд давтамж (60 герц) өөр учир эдгээр зах зээлд зориулагдаж үйлдвэрлэгдсэн багаж техник Монголд тохирохгүй, ажиллахгүй, ажилласан ч эдэлгээний хугацаа богино байдаг гэдгийг анхаарах хэрэгтэй юм.

Нэгж шилжүүлэг