Цахилгаан багаж үйлдвэрлэлээр дэлхийд тэргүүлэгч, 100 гаруй жлийн туршлагатай Японы “Макита” фирмийн албан ёсны дистрибьютр “Юнитра” компани 2019 оны 5 сарын 23,24-ны өдрүүдэд “Батарейт багажны шинэ эрин-Цахилгаан багажнаас ч хүчтэй” гэсэн уриатай өдөрлөгийг зохион байгууллаа. Жил бүр уламжлал болон зохиогддог бүтээгдэхүүн танилцуулах уг өдөрлөгийн хамтран зохион байгуулагч нь Японы “Макита” корпораци. Өнөө жилийн өдөрлөгт “Макита”-гийн Хонгконг дахь салбар компанийн захирал Южи Такемаса иржээ. Тэрээр “Макита” корпорацийн Хонгконг дахь салбар манай улсыг хариуцдаг юм байна. Южи Такемаса “Манай корпораци ажил хийж буй хүмүүсийн хөдөлмөрийн аюулгүй байдал, ажлын орчин, байгаль орчинд ээлтэй батарейт багаж үйлдвэрлэж зохион бүтээх тал дээр голлон ажиллаж байна. Энэ төрлийн багажны салбарт худалдан авалтын дараахь засвар үйлчилгээг нэвтрүүлэхэд онцгой анхаардаг” хэмээн онцоллоо.
“Юнитра” компанийн ерөнхий захирал Ж.Довдонбалжир “Манай компани Японы цахилгаан багажны үйлдвэрлэгч Макита-гийн цорын ганц, албаны ёсны дистрибьютр. Өнөө жилийн өдөрлөгөө “Макита Монголд 10 дахь жилдээ” гэсэн нэртэйгээр зохион байгуулж байна. Макита батарейт багаж цахилгаан багажнаас илүү хүчтэй гэсэн уриан дор болж буй нь энэ жилийн өдөрлөгийн гол онцлог. Бид харилцагч төвтэй ажиллахад онцгой анхаарч эхэлсэн. Үүнийхээ хүрээнд 48 цагийн засвар үйлчилгээний хэсгийг ашиглалтад орууллаа” гэж ярив.
Тус компанийн засварын төвд “Макита” багажны засварын хэсгийг тусад нь байгуулжээ. 48 цагийн дотор хэрэглэгчдэд багажийг нь засаад өгөх стандарт, хүчин чадалтай юм байна. Өдөрлөгт оролцогчид борлуулалтын дараах үйлчилгээндээ анхаарч засварын хэсэг нээсэнд нь олзуурхаж байв. “Макита”-гийн бүтээгдэхүүнийг танилцуулах өдөрлөгт барилгын үйлдвэрлэл эрхлэгчид, үйлчилгээний салбарынхан, тэр дундаа гадна интерьер засал чимэглэлийнхэн олноороо ирсэн харагдлаа. “Юнитра” компани 5 сарын 23-ны өдөр зохион байгуулсан өдөрлөгөө барилга үйлдвэрлэл, үйлчилгээний салбарынханд зориулсан юм. Харин тэд 5 сарын 24-ны өдөр уул уурхайн салбарынханд зориулсан бүтээгдэхүүнээ танилцуулж, багажны хөдөлмөр хамгаалал аюулгүй ажиллагааны танилцуулга мэдээлэл өгөхөөр төлөвлөжээ. Өдөрлөгийн үеэр “Юнитра” компанийнхан “Утасгүй технологи” буюу “батарейт багаж”-ны сонголт, онцлог, зөв хэрэглээний талаар дэлгэрэнгүй мэдээлэл өгхийн сацуу багажны хөдөлмөр хамгаалал, аюулгүй ажиллагааны талаар нилээд дэлгэрэнгүй заавар зөвлөгөө өгч байсан онцлог байлаа.
Барилга, уул уурхай, эрчим хүч, дэд бүтэц болон үйлдвэрлэлийн бүх л салбарт батарейт багажны хэрэглээ улам бүр нэмэгдэх болжээ. Ийм шалтгаанаар аюулгүй байдал, чанараараа дэлхийд хүлээн зөвшөөрөгдсөн “Макита” шиг том брэндүүдийн бүтээгдэхүүний эрэлт өссөөр байгаа аж. Манайх шиг дэд бүтэц сул хөгжсөн улсад уул уурхай, зам гэх мэт салбарт, тодруулж хэлбэл цаг хугацаа орон зайн хувьд алслагдмал газруудад батарейт багажны хэрэглээ өндөр байдаг гэнэ.
Энэ жилийн өдөрлөгт танилцуулагдаж буй “Макита” шинэ төрлийн батарейт багажууд цахилгаан багажийг давсан өндөр хүчин чадалтайгаараа онцлог гэж “Юнитра” компанийн зүгээс тайлбарлаж байлаа. Урьд өмнө нь батарейт багажийг нэг бол цахилгаан багажны завсар зайгаар хэрэглэдэг, эсвэл хүчин чадал багатай гэсэн ойлголт хандлага давамгайлж байж. Харин одоо тэр хандлага өөрчлөгджээ. Цахилгаан багажнаас өндөр хүчин чадалтай батарейт багажуудыг өдөрлөгт оролцогчид сонирхон туршиж байсан юм. Сонирхуулж хэлэхэд “Юнитра” компани 25 мянган батарейт багажийг Монголын хэрэглэгчдэд нийлүүлжээ.
“Юнитра” компанийн гүйцэтгэх захирал Д.Мэргэн “Макита цахилгаан багаж бол өндөр хүчин чадал, аюулгүй ажиллагааг хангахыг шаардсан салбарт зориулагдсан багаж. Монголын нөхцөлд тохиромжтой болох нь өнгөрсөн арван жилийн хугацаанд батлагдсан. Монгол дахь дистрибьютр компанийн хувьд харилцагчдаа байнга сонсох байдлаар үйлдвэрлэлийн төвшинд хүртэл сайжруулалтад оролцож ажилладаг. Макита, Юнитра компаниуд гурван зүйлийг голчилж анхаардаг. Нэгдүгээрт борлуулалтын өмнөх зөвлөгөө мэдээллийг өгөх байдлаар хэрэглэгчдэд зөв сонголт хийхэд нь тусалдаг. Хоёрдугаарт цахилгаан багажны зөв хэрэглээг хэвшүүлэхэд анхаардаг. Гуравдугаарт борлуулалтын дараахь засвар үйлчилгээг хамгийн сайн байлгахын төлөө зорьж ажилладаг” гэж ярилаа.
Өдөрлөгийн арга хэмжээнд 150 гаруй байгууллагын 300 гаруй хүн оролцлоо. Оролцогчид “Макита” брэндийн сүүлийн үеийн дэвшилтэт технологиор бүтээгдсэн батарейт багажны танилцуулгыг сонсч, ашиглалттай холбоотой дэлгэрэнгүй мэдээлэл зөвлөгөө авч, багажуудыг бодитоор туршиж үзэж, 10-25 хувийн хямдралтай, бэлэгтэй худалдаанд оролцсон юм.
