2025 оны 8 дугаар сарын 14-ний өдөр Asem Restaurant & Clubhouse-д манай байгууллагаас “Үл тасрах эрчим хүч 2.0” арга хэмжээг амжилттай зохион байгууллаа.
Өдөрлөгийн үндсэн зорилго нь Монгол Улсад эрчим хүчний тогтвортой байдалд тулгарч буй эрсдэлийг тодорхойлж, бизнесийн байгууллагуудад найдвартай цахилгаан хангамжийн шийдлийг танилцуулахад чиглэсэн юм.
Өнөөдрийн нөхцөлд эрчим хүчний эх үүсвэр, дэд бүтцийн олон хэсэг ашиглалтын хугацаагаа дуусгаж, найдвартай ажиллагаа нь буурч байна. Үүний улмаас цахилгаан хангамжийн хязгаарлалт нэмэгдэж, аж ахуйн нэгжүүдийн хэвийн үйл ажиллагаанд сөргөөр нөлөөлөх эрсдэл үүсч байгаа нь найдвартай нөөц эх үүсвэртэй байх шаардлагыг урьд өмнөхөөс илүү хурцаар тавьж байна.
Энэ асуудлын хүрээнд бид Испанид үүсгэн байгуулагдаж, дэлхийд цахилгаан үүсгүүрийн үйлдвэрлэлийн салбарт тэргүүлж буй HIMOINSA брэндийн дэвшилтэт шийдлүүдийг танилцууллаа. HIMOINSA нь Японы YANMAR ENERGY SYSTEM CO., LTD-ийн бүрэлдэхүүнд багтдаг бөгөөд олон улсын стандартын дагуу найдвартай ажиллагаа, эдийн засгийн үр ашгийг хослуулсан бүтээгдэхүүнээрээ өргөнөөр танигдсан юм.
Арга хэмжээний үеэр бизнесийн салбарын удирдлагууд оролцож, цахилгаан үүсгүүрийн бодит ажиллагааг газар дээр нь үзэхийн зэрэгцээ техник-эдийн засгийн үр өгөөжийн танилцуулга, байгууллагын онцлогт нийцсэн шийдлийн саналуудтай танилцлаа.
“Үл тасрах эрчим хүч 2.0” өдөрлөг нь шинэ технологийг танилцуулахаас гадна бизнесийн байгууллагуудад эрчим хүчний эрсдэлийг удирдах, тогтвортой ажиллагааны төлөвлөгөөгөө боловсронгуй болгох, мөн салбарын тэргүүлэгчидтэй харилцаа холбоо тогтоох өргөн боломжийг олгосон онцлох арга хэмжээ болж өндөрлөлөө.
